काठमाडौं । नेपाल आयल निगमले आज (बुधबार)देखि उपभोक्तालाई पुनः भरी अर्थात् १४.२ केजीको खाना पकाउने एलपी ग्यास बिक्री वितरण सुरु गरेको छ।
निगमले मंगलबार सूचना जारी गर्दै देशभर साबिककै १४.२ केजी ग्यास सिलिन्डर बजारमा पठाउने निर्णय गरेको जनाएको हो। यसअघि अन्तर्राष्ट्रिय बजारमा इन्धन आपूर्तिको अनिश्चितता र ग्यासको कृत्रिम अभाव रोक्न सरकारले २९ फागुनदेखि ७.१ केजी (आधा सिलिन्डर) मात्र बिक्री गर्ने व्यवस्था लागू गरेको थियो।
पछिल्लो समय भारतबाट ग्यासको आपूर्ति नियमित भएपछि उपभोक्ताको मागलाई ध्यानमा राख्दै निगमले पुनः भरी सिलिन्डर बिक्री गर्ने निर्णय गरेको हो।
निगमका अनुसार ७.१ केजीका सिलिन्डर पूर्ण रूपमा प्रतिस्थापन नहुन्जेल केही समय दुवै प्रकारका सिलिन्डर बजारमा उपलब्ध हुनेछन्। त्यसैले ग्यास खरिद गर्दा सिलिन्डरको तौल र मूल्य राम्रोसँग यकिन गरेर मात्रै खरिद गर्न उपभोक्तालाई आग्रह गरिएको छ।
