काठमाडौं । नेपाली कांग्रेसको केन्द्रीय नीति, अनुसन्धान तथा प्रशिक्षण प्रतिष्ठानले आफ्नो संगठनलाई थप विस्तार तथा समावेशी बनाउने उद्देश्यले नयाँ सदस्यहरू मनोनयन गरेको छ।
पार्टीका उपसभापति एवं प्रतिष्ठानका प्रमुख विश्वप्रकाश शर्माले नेपाली कांग्रेसको विधान, २०१७ (संशोधन सहित) को धारा ३६ (१) (ग) बमोजिम आज ८ जना विज्ञ र अनुभवी व्यक्तिहरूलाई प्रतिष्ठानको सदस्यमा नियुक्त गरेका हुन्।
प्रतिष्ठानका कार्यवाहक मुख्य सचिव कृष्णप्रसाद दुलालका अनुसार विभिन्न व्यावसायिक र प्राज्ञिक क्षेत्रका व्यक्तिहरूलाई समेटेर समिति विस्तार गरिएको हो। यसरी नियुक्त हुने सदस्यहरूमा नेपाली कांग्रेसका केन्द्रीय सदस्य एवं राष्ट्रिय लोकतान्त्रिक अपाङ्ग संघका पूर्व केन्द्रीय अध्यक्ष प्रकाश पन्थ र अल्पसंख्यक ह्योल्मो समुदायका विषयमा विद्यावारिधि गरेका डा. प्रेमध्वज लामा रहेका छन्।
त्यस्तै, ‘पब्लिक पोलिसी’ मा स्नातकोत्तर तथा नेपाली जनसम्पर्क समिति बेलायतका पूर्व संयोजक विज्ञान प्रसाईं, आदिवासी जनजाति प्रतिष्ठानका पूर्व कार्यकारी अध्यक्ष रेशम गुरुङ र कृषि अभियन्ता एवं मुक्तिनाथ कृषि कम्पनीका अध्यक्ष सिताराम काफ्ले पनि प्रतिष्ठानमा नियुक्त भएका छन्।
यसैगरी, प्रतिष्ठानमा ‘एलजिबिटिक्युआइए’ समुदायको प्रतिनिधित्व गर्दै अंग्रेजी साहित्यमा स्नातकोत्तर गरेकी प्रतीक्षा चापागाईं तथा मास कम्युनिकेसनमा स्नातकोत्तर गरेका मोहन गजुरेल र सोही विषयमा स्नातकोत्तर गरेकी अनुपा श्रेष्ठलाई पनि सदस्यको जिम्मेवारी दिइएको छ।
