अमेरिकी राष्ट्रपति डोनाल्ड ट्रम्पले इरानसँग भएको युद्धविरामसम्बन्धी समझदारी अब समाप्त भएको घोषणा गर्दै भविष्यमा कूटनीतिक वार्ताभन्दा अन्य विकल्पमा केन्द्रित हुने संकेत दिएका छन्।
बुधबार सञ्चारकर्मीसँग कुरा गर्दै ट्रम्पले इरानले सम्झौताको भावना विपरीत गतिविधि गरेको आरोप लगाए। उनले इरानले ‘स्ट्रेट अफ हर्मुज’ क्षेत्रमा व्यावसायिक जहाजहरूलाई निशाना बनाएर युद्धविराम उल्लंघन गरेको दाबी गरे। साथै, इरानी नेतृत्वप्रति कडा टिप्पणी गर्दै उनीहरूलाई ‘झुटा’, ‘निकृष्ट’ र ‘हिंसात्मक मानसिकता भएका’ व्यक्तिहरूको नेतृत्वमा रहेको आरोप लगाए।
यो प्रतिक्रिया त्यसपछि आएको हो, जब इस्लामिक रिभोलुसनरी गार्ड कोर्स (IRGC) ले अमेरिकाले इरानमाथि गरेको आक्रमणको जवाफस्वरूप बहराइन र कुवेतस्थित अमेरिकी सैन्य लक्ष्यहरूमा आक्रमण गरेको दाबी गरेको थियो।
ट्रम्पले इरानसँगको वार्ता अब कुनै अर्थ नरहेको बताउँदै भने, “उनीहरूसँग व्यवहार गर्नु समयको बर्बादी मात्र हो। उनीहरू झुट बोल्ने समूह हुन्।” उनले इरानसँग परमाणु हतियार भए त्यसको प्रयोग गर्न पछि नपर्ने दाबीसमेत गरे।
यस्तै, नेटो शिखर सम्मेलनअघि ट्रम्पले सदस्य राष्ट्रहरूप्रति पनि असन्तुष्टि व्यक्त गरे। अमेरिकाले युरोपको सुरक्षाका लागि असन्तुलित रूपमा धेरै खर्च गरिरहेको दाबी गर्दै उनले अन्य सदस्य राष्ट्रहरूले अझ बढी जिम्मेवारी लिनुपर्ने बताए।
यता नेटो महासचिव मार्क रुट्टेले भने क्यानडा र युरोपेली देशहरूले सन् २०२५ र २०२६ मा रक्षा क्षेत्रमा थप २५८ अर्ब अमेरिकी डलर खर्च गर्ने प्रतिबद्धता जनाएको जानकारी दिएका छन्।
ट्रम्पको पछिल्लो अभिव्यक्तिले इरान–अमेरिका सम्बन्ध थप तनावपूर्ण बन्न सक्ने संकेत दिएको छ भने युद्धविराम र कूटनीतिक समाधानको सम्भावना पनि कमजोर बन्दै गएको विश्लेषण गरिएको छ।
