काठमाडौं, असार ३० । प्रभु बैंकबाट लिएको कर्जा दुरुपयोग गरेको आरोपमा व्यवसायी शशी शर्मा पौडेल पक्राउ परेका छन्।
नेपाल प्रहरीको केन्द्रीय अनुसन्धान ब्यूरो (सीआईबी) ले मंगलबार उनलाई पक्राउ गरेको हो। प्रहरीले रिसोर्ट निर्माणका लागि लिएको बैंक कर्जा अन्य प्रयोजनमा दुरुपयोग गरेको आरोपमा उनीमाथि अनुसन्धान अघि बढाएको जनाएको छ।
शशी शर्मा, सम्पत्ति शुद्धीकरण मुद्दामा हिरासतमा रहेका एमाले उपाध्यक्ष तथा पूर्वअर्थमन्त्री विष्णु पौडेलका निकट व्यवसायी मानिन्छन्। विष्णु पौडेलले रुपन्देहीमा करोडौँ रुपैयाँ बराबरको जग्गा शशी शर्माको नाममा राखेको भन्ने सूचनाका आधारमा सम्पत्ति शुद्धीकरण अनुसन्धान विभाग ले पनि छुट्टै अनुसन्धान गरिरहेको छ।
