काठमाडौं, २७ असार। लगातारको अविरल वर्षापछि बागमती नदीको जलस्तर बढ्दा कीर्तिपुर नगरपालिका–१०, सुन्दरीघाटस्थित राधास्वामी सुकुमवासी होल्डिङ सेन्टर शुक्रबार राति डुबानमा परेको छ।
डुबानको सूचना प्राप्त हुनासाथ सशस्त्र प्रहरी र नेपाल प्रहरीले संयुक्त रूपमा उद्धार अभियान सञ्चालन गरी ५४ जनालाई सकुशल उद्धार गरेर त्रिभुवन विश्वविद्यालय परिसरस्थित स्मृति भवनमा सुरक्षित स्थानान्तरण गरेका छन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार राति १:३८ बजे सूचना प्राप्त भएपछि सशस्त्र प्रहरीका डीएसपीको नेतृत्वमा ३० जना विपद् व्यवस्थापन टोली र नेपाल प्रहरीका ३० जना सुरक्षाकर्मी उद्धारमा खटिएका थिए। होल्डिङ सेन्टरमा रहेका १५४ जनामध्ये जोखिममा परेका ५४ जनालाई सुरक्षित स्थानमा सारिएको हो।
प्राधिकरणले बागमती नदीको बहाव अझै बढ्न सक्ने भएकाले नदी किनार तथा तल्लो तटीय क्षेत्रमा बसोबास गर्ने सर्वसाधारणलाई उच्च सतर्कता अपनाउन आग्रह गरेको छ।
