काठमाडौं । काठमाडौंमा आइतबार प्रहरीले गोली चलाएर तीन जना लागुऔषध कारोबारीलाई पक्राउ गरेको छ। पक्राउ पर्नेमा एक भारतीय र दुई नेपाली नागरिक रहेका छन्।
प्रहरीको लागुऔषध कानुन कार्यान्वयन ब्युरो (टेकु) को टोलीले विभिन्न स्थानबाट पछ्याउँदै टेकुस्थित काठमाडौं महानगरपालिकाको फोहोर मैला भण्डारणस्थलमा पुगेपछि गोली प्रहार गरी उनीहरूलाई नियन्त्रणमा लिएको हो।
ब्युरो प्रमुख एसएसपी सुवासचन्द्र बोहराका अनुसार गोली लागेर एक भारतीय नागरिक घाइते भएका छन्। उनको वीर अस्पतालमा उपचार भइरहेको छ भने दुई नेपाली नागरिकलाई प्रहरीले नियन्त्रणमा लिएर थप अनुसन्धान अघि बढाएको छ।
यस्तै, चन्द्रागिरि नगरपालिका–१५ ढुंगेअड्डाबाट सशस्त्र प्रहरीले ठूलो परिमाणमा औषधिजन्य लागुऔषधसहित दुई जनालाई पनि पक्राउ गरेको छ। पक्राउ पर्नेमा ३९ वर्षीय अनिल देउला र २४ वर्षीया सुमित्रा राई रहेका छन्।
प्रहरीले उनीहरूको साथबाट १५ हजार क्याप्सुल ट्रामाडोल, डाइजापम, फेनरागन ट्याब्लेट, थप ट्रामाडोल र अन्य औषधिजन्य लागुऔषध बरामद गरेको जनाएको छ। पक्राउ परेकामाथि थप अनुसन्धान तथा कानुनी प्रक्रिया अघि बढाइएको प्रहरीले जनाएको छ।
