काठमाडौं। शक्तिशाली आँधी ‘बावी’ चीनको पूर्वी तटीय क्षेत्रमा प्रवेश गरेसँगै सरकारले व्यापक सतर्कता अपनाएको छ। सम्भावित जनधनको क्षति न्यूनीकरण गर्न करिब २० लाख मानिसलाई सुरक्षित स्थानमा स्थानान्तरण गरिएको छ।
चीनको मौसम विभागका अनुसार बावीले शनिबार साँझ झेजियाङ प्रान्तको ताइझोउ नजिक पहिलो पटक जमिनमा प्रवेश गरेको थियो। त्यसपछि सोही रात वेन्झोउ क्षेत्रमा दोस्रो पटक ल्याण्डफल गरेको हो। करिब १,००० किलोमिटर फैलिएको यो आँधी फ्रान्सको आकार बराबर क्षेत्रलाई प्रभावित पार्ने अनुमान गरिएको छ।
चीन पुग्नुअघि बावीले जापानका दुर्गम टापुहरू र ताइवानको उत्तरी क्षेत्रमा पनि भारी वर्षा गराएको थियो। फिलिपिन्समा भने यसै आँधीका कारण आएको पहिरोमा कम्तीमा १७ जनाको मृत्यु भएको छ।
यद्यपि आँधीको तीव्रता क्रमशः कमजोर बन्दै गएको छ, तर यससँगै आएको अत्यधिक आर्द्रताका कारण भारी वर्षा, बाढी र पहिरोको जोखिम अझै कायम रहेको अधिकारीहरूले बताएका छन्।
राज्य सञ्चालित सञ्चारमाध्यमका अनुसार झेजियाङ प्रान्तबाट मात्रै १७ लाखभन्दा बढी मानिसलाई सुरक्षित स्थानमा सारिएको छ भने अन्य प्रभावित प्रान्तहरूमा पनि हजारौं नागरिकलाई स्थानान्तरण गरिएको छ।
आँधीको प्रभावका कारण झेजियाङमा विद्यालय, सरकारी कार्यालय र बाहिरी गतिविधि स्थगित गरिएका छन्। साथै करिब ४०० उडान र धेरै रेल सेवा रद्द गरिएको छ। राजधानी बेइजिङमा समेत सतर्कता अपनाउँदै करिब एक लाख मानिसलाई सुरक्षित स्थानमा जान निर्देशन दिइएको छ।
यसअघि यही हप्ताको सुरुमै दक्षिणी चीन टाइफुन ‘मेसाक’ बाट प्रभावित भएको थियो, जसका कारण कम्तीमा ३९ जनाको ज्यान गएको थियो। लगातार दुई शक्तिशाली आँधीका कारण चीनका प्रभावित क्षेत्रमा उच्च सतर्कता कायम गरिएको छ।
