काठमाडौँ — काठमाडौंको ठमेलबाट ४ किलो २५८ ग्राम तरल कोकेनसहित दुई विदेशी महिला पक्राउ परेका छन्। प्रहरीले लागूऔषध तस्करीमा प्रयोग गरिएको नयाँ शैली सार्वजनिक गर्दै घटनालाई अन्तर्राष्ट्रिय गिरोहसँग जोडेर अनुसन्धान अघि बढाएको जनाएको छ।
लागुऔषध नियन्त्रण ब्युरोका अनुसार पक्राउ पर्नेमा कोलम्बियाकी ६२ वर्षीया योनेथ गार्जोन साइसेदो र भारतको मणिपुरकी ३७ वर्षीया रेबिका पुली रहेका छन्। कोलम्बियाबाट दोहा हुँदै काठमाडौं आएकी साइसेदोको सुटकेसभित्र ‘फल्स बटम’ बनाएर ब्ल्याङ्केट, म्याट, ज्याकेट, एप्रोन र नेक पिलोभित्र सिलिकनसँग मिसाइएको अवस्थामा ४ किलो २५८ ग्राम तरल कोकेन लुकाइएको भेटिएको प्रहरीले जनाएको छ।
अनुसन्धानका क्रममा उक्त कोकेन बुझ्न भारतबाट काठमाडौं आएकी रेबिका पुलीलाई पनि पक्राउ गरिएको हो। दुवै महिलालाई साउन ३ गते नियन्त्रणमा लिएर थप अनुसन्धान भइरहेको ब्युरोले जनाएको छ।
प्रहरीले उनीहरूको साथबाट तरल कोकेन, राहदानी, भारतीय परिचयपत्र, २०० अमेरिकी डलर, चार थान मोबाइल फोन र एउटा सुटकेस बरामद गरेको छ।
ब्युरोका अनुसार सिलिकनसँग मिश्रण गरी कपडाको आकारमा तरल कोकेन तयार पारेर नेपाल भित्र्याइएको यो विधि लागूऔषध तस्करीको नयाँ र अत्याधुनिक तरिका भएको प्रारम्भिक अनुसन्धानबाट खुलेको छ। प्रहरीले यस घटनामा संलग्न अन्य व्यक्तिको खोजी तथा अन्तर्राष्ट्रिय सञ्जालको विषयमा समेत अनुसन्धान तीव्र बनाएको जनाएको छ।
