काठमाडौं, ४ साउन । कञ्चनपुरको शुक्लाफाँटा राष्ट्रिय निकुञ्जभित्र च्याउ टिप्न जाँदा सम्पर्कविहीन भएका १४ जना महिला सकुशल परिवारको सम्पर्कमा फर्किएका छन्।
भीमदत्त नगरपालिका–१९ बागफाँटाका ती महिलाहरू आइतबारदेखि सम्पर्कविहीन भएपछि नेपाली सेना, नेपाल प्रहरी, सशस्त्र प्रहरी, नगर प्रहरी र निकुञ्ज प्रशासनले संयुक्त रूपमा व्यापक खोजी अभियान सञ्चालन गरेका थिए।
शुक्लाफाँटा राष्ट्रिय निकुञ्ज सुरक्षार्थ खटिएका रणसिंह दल गणका गणपति प्रमुख सेनानी प्रकाश घिमिरेका अनुसार खोजी अभियानकै क्रममा महिलाहरू परिवारको सम्पर्कमा आएका हुन्। उनका अनुसार सबै महिला सुरक्षित अवस्थामा रहेका छन्।
यसअघि बेल्डाँडी गाउँपालिका–२ का तीन जना महिलालाई पनि सेनाको टोलीले सोमबार बिहान निकुञ्जभित्रबाट सकुशल उद्धार गरी परिवारको जिम्मा लगाएको थियो।
च्याउ टिप्न अवैध रूपमा निकुञ्ज प्रवेश गरेका तीनवटा महिला समूह सम्पर्कविहीन भएपछि सुरक्षा निकायले उच्च सतर्कताका साथ खोजी अभियान सञ्चालन गरेको थियो। अहिले सम्पर्कविहीन सबै महिला सुरक्षित रूपमा घर फर्किएको पुष्टि भएको छ।
