मकवानपुर। लगातारको वर्षासँगै पहिरोको जोखिम बढेपछि हेटौँडाबाट काठमाडौंतर्फ जाने सबै सवारीसाधन सोमबार साँझदेखि हेटौँडामै रोकिएका छन्। यात्रुको सुरक्षालाई प्राथमिकतामा राख्दै जिल्ला प्रशासन कार्यालय मकवानपुरले सवारी सञ्चालन अस्थायी रूपमा स्थगित गरेको हो।
प्रशासनको निर्देशनअनुसार हेटौँडा–भैँसे–भीमफेदी–देउराली हुँदै काठमाडौं जाने सडकमार्गमा चल्ने सबै सवारीसाधनलाई हेटौँडा–१, चौकीटोलमा होल्ड गरिएको छ। सोमबार साँझ ५ बजेदेखि मंगलबार बिहान ५ बजेसम्म उक्त सडकखण्डमा सवारी आवागमन बन्द रहने निर्णय गरिएको छ।
लगातारको वर्षाका कारण भीमफेदी, भैँसे, देउराली र सिस्नेरी क्षेत्रका पहाडी सडकमा जुनसुकै बेला पहिरो खस्न सक्ने तथा सडक अवरुद्ध हुने जोखिम बढेकाले पूर्वसावधानीस्वरूप यस्तो निर्णय गरिएको प्रशासनले जनाएको छ।
निर्णय लागू भएसँगै काठमाडौं गन्तव्य बनाएका लामो तथा छोटो दूरीका बस, मालवाहक ट्रक र अन्य सवारीसाधन चौकीटोल क्षेत्रमा रोकिएका छन्। प्रहरी टोलीले चालक तथा यात्रुलाई सुरक्षित स्थानमा बस्न र प्रशासनको निर्देशन पालना गर्न आग्रह गरेको छ।
प्रमुख जिल्ला अधिकारी बसन्त अधिकारीले मौसममा सुधार आएर सडक सुरक्षित भएपछि मात्र सवारी सञ्चालन गरिने जानकारी दिएका छन्। साथै, मौसम र सडकको अवस्था निरन्तर अनुगमन भइरहेको भन्दै अत्यावश्यक कामबाहेक यात्रा नगर्न र प्रशासनले जारी गरेका सूचनाको पालना गर्न सर्वसाधारणसँग अनुरोध गरेका छन्।
