काठमाडौं, ८ असार – अविरल वर्षापछि बाजुराको बडिमालिका नगरपालिका–९ स्थित सेलागाड खोला र बाउली खोलाको दोभान क्षेत्रबाट आएको बाढी बस्तीमा पस्दा १३ परिवार जोखिममा परेका छन्। जोखिममा परेका सबै परिवारलाई बिहीबार रातिनै घरका आवश्यक सामानसहित सुरक्षित स्थानमा सारिएको प्रहरीले जनाएको छ।
जिल्ला प्रहरी कार्यालय बाजुराकी प्रमुख प्रहरी नायब उपरीक्षक (डीएसपी) शैलेश्वरी बोहराका अनुसार प्रभावित परिवारलाई तत्काल नजिकैका सुरक्षित स्थानीय बासिन्दाको घरमा राखिएको छ। बाढीका कारण तीन वटा घर भने अत्यन्तै उच्च जोखिममा रहेका छन्।
जिल्ला विपद् व्यवस्थापन समितिले सार्वजनिक गरेको ‘विपद् पूर्वतयारी तथा प्रतिकार्य योजना–२०८३’ अनुसार बाजुराका १०० भन्दा बढी गाउँ बाढी र पहिरोको उच्च जोखिममा रहेका छन्।
दुई स्थानमा सडक अवरुद्ध
यसैबीच, निरन्तर वर्षासँगै खसेको पहिरोका कारण बडिमालिका नगरपालिका–६ र जिल्ला कारागार पछाडिको सडक पूर्ण रूपमा अवरुद्ध भएको प्रहरीले जनाएको छ। अवरुद्ध सडक खुलाउन सम्बन्धित निकायले डोजर परिचालन गरी काम गरिरहेको छ। स्थानीयवासीलाई आवश्यक सतर्कता अपनाउन प्रशासनले आग्रह गरेको छ।
