काठमाडौं ।वैदेशिक रोजगार विभागले कानुनी व्यवस्था उल्लंघन गर्दै नेपाली श्रमिकलाई भारतीय विमानस्थल प्रयोग गरी विदेश पठाउने १५९ वटा म्यानपावर कम्पनीलाई कारबाही गरेको छ। विभागले वैदेशिक रोजगार ऐन, २०६४ को दफा २२ उल्लंघन गरेको ठहर गर्दै ती कम्पनीलाई पहिलो चरणमा सचेत गराएको हो।
विभागले २०८२ चैत १ देखि २०८३ जेठ मसान्तसम्म श्रम स्वीकृति लिएर विदेश गएका नेपाली कामदारको उडान विवरणको अनुगमन गरेको थियो। अनुगमनका क्रममा विभागको स्वीकृतिबिना भारतीय विमानस्थल प्रयोग गरी श्रमिक विदेश पठाइएको पुष्टि भएपछि कारबाही प्रक्रिया अघि बढाइएको जनाएको छ।
देशभर रहेका १ हजार ११७ इजाजतप्राप्त म्यानपावर कम्पनीमध्ये ६७८ कम्पनीले मात्र विभागले मागेको विवरण बुझाएका थिए। ती विवरणको परीक्षण गर्दा १५९ कम्पनीले नियमविपरीत भारतीय विमानस्थलबाट श्रमिक पठाएको भेटिएको हो।
यस्तै, विभागले विवरण नै नबुझाउने ४३९ वटा म्यानपावर कम्पनीलाई पनि सचेत गराएको छ। ती कम्पनीले वैदेशिक रोजगार ऐन, २०६४ को दफा ३७ उल्लंघन गरेको ठहर गर्दै आवश्यक विवरण तत्काल उपलब्ध गराउन निर्देशन दिइएको विभागले जनाएको छ।
यसैबीच, पटक–पटक नियम उल्लंघन गर्ने आठ म्यानपावर कम्पनीमाथि थप कडा कारबाही गरिएको छ। विभागले ती कम्पनीलाई जनही ५० हजार रुपैयाँका दरले जरिबाना गरेको जनाएको छ। विभागका अनुसार तीन कम्पनीले पुनः भारतीय विमानस्थलबाट श्रमिक पठाएको भेटिएको थियो भने पाँच कम्पनीले मागिएको विवरण नै उपलब्ध गराएका थिएनन्।
विभागले यसअघि २०८३ असार २६ गते सूचना जारी गर्दै श्रमिकलाई कुन विमानस्थलबाट विदेश पठाइएको हो भन्ने विवरण अनिवार्य रूपमा उपलब्ध गराउन सबै म्यानपावर कम्पनीलाई निर्देशन दिएको थियो। लामो समयदेखि भारतीय विमानस्थल हुँदै नेपाली श्रमिक विदेश पठाइने गुनासो बढेपछि विभागले निगरानी कडा बनाएको र सोही आधारमा हालको कारबाही गरिएको जनाएको छ।
