काठमाडौं । कृषि, वन तथा पर्यावरणमन्त्री गीता चौधरीले सरकारले रासायनिक मललाई दीर्घकालीन समाधानका रूपमा नलिई जैविक तथा प्राङ्गारिक मलको उत्पादन र प्रयोगलाई प्राथमिकतामा राखेको बताएकी छन्।
शुक्रबार प्रतिनिधिसभाअन्तर्गत कृषि तथा प्राकृतिक स्रोत समितिको बैठकमा बोल्दै मन्त्री चौधरीले रासायनिक मलको प्रयोग क्रमशः घटाउँदै स्वदेशमै उत्पादन गर्न सकिने जैविक मलको प्रवर्द्धनमा सरकार केन्द्रित हुने स्पष्ट पारिन्।
उनले रासायनिक मल नेपालमा उत्पादन नहुने र अन्तर्राष्ट्रिय बजारमा निर्भर रहनुपर्ने ‘ग्लोबल गुड्स’ भएकाले यसको दिगो व्यवस्थापनका लागि परराष्ट्र, अर्थ र कृषि मन्त्रालयबीच समन्वय गरेर अघि बढ्ने प्रतिबद्धता व्यक्त गरिन्।
रुस–युक्रेन युद्धका कारण केही महिनाअघि विश्वव्यापी रूपमा रासायनिक मल आपूर्तिमा असर परेको स्मरण गराउँदै मन्त्री चौधरीले प्रधानमन्त्रीको नेतृत्वमा भएका द्रुत पहलका कारण हाल मलको आपूर्ति सहज भएको जानकारी दिइन्।
उनका अनुसार आगामी ३ देखि ४ महिनासम्मका लागि आवश्यक रासायनिक मलको मौज्दात सुरक्षित भइसकेको छ। अब सरकारले दीर्घकालीन समाधानका रूपमा जैविक तथा प्राङ्गारिक मल उत्पादन र प्रयोगलाई प्रोत्साहन गर्ने रोडम्याप कार्यान्वयनमा लैजाने तयारी गरेको छ।
मन्त्री चौधरीले सरकारले चालु बजेटमार्फत जैविक तथा प्राङ्गारिक मल उत्पादन र प्रवर्द्धनका कार्यक्रमका लागि बजेटसमेत उल्लेख्य रूपमा बढाएको जानकारी दिइन्।
