काठमाडौं । रुसले युक्रेनको राजधानी किभमा युद्ध सुरु भएयताकै सबैभन्दा ठूलो ब्यालिस्टिक क्षेप्यास्त्र आक्रमण गरेको छ। शनिबार रातभर भएको श्रृंखलाबद्ध हमलामा हालसम्म एक जनाको मृत्यु भएको छ भने कम्तीमा १४ जना घाइते भएका छन्।
युक्रेनी राष्ट्रपति भोलोदिमिर जेलेन्स्कीले यसलाई “किभमाथिको सबैभन्दा ठूलो ब्यालिस्टिक आक्रमणमध्ये एक” भएको बताएका छन्। युक्रेनी सेनाका अनुसार रुसले ४१ वटा क्षेप्यास्त्र र १२५ वटा ड्रोन प्रयोग गरेको थियो। तीमध्ये १८ वटा क्षेप्यास्त्र र १०८ वटा ड्रोन खसालिएको दाबी गरिएको छ।
आक्रमणमा इस्कान्देर र हाइपरसोनिक जिर्कोन क्षेप्यास्त्र प्रयोग गरिएको युक्रेनी वायुसेनाले जनाएको छ। किभका मेयर भिताली क्लिच्कोका अनुसार आवासीय भवन, सुपरमार्केट र छात्रावासमा समेत क्षति पुगेको छ भने दुईवटा गोदाममा लागेको आगो नियन्त्रणमा लिन दमकल टोली खटिएको छ।
जेलेन्स्कीका अनुसार रुसले पछिल्लो एक सातामै युक्रेनमाथि १,४५० आक्रमणकारी ड्रोन, १,६४० भन्दा बढी निर्देशित बम र ९९ प्रकारका क्षेप्यास्त्र प्रहार गरेको छ।
युक्रेनले रुसको सबैभन्दा ठूलो अनलाइन खुद्रा कम्पनी वाइल्डबेरीजका दुई गोदाममा ड्रोन आक्रमण गरेपछि रुसले त्यसको जवाफस्वरूप किभमा व्यापक हमला गरेको बताइएको छ।
