काठमाडौँ । विश्वकपको माहोल चलिरहँदा अर्जेन्टिनी फुटबल संघ (AFA) अमेरिकामा भएका आर्थिक कारोबारका विषयमा अमेरिकी एफबीआई र संघीय सरकारी अभियोजकहरूको अनुसन्धानको दायरामा परेको छ।
अन्तर्राष्ट्रिय सञ्चारमाध्यमका अनुसार अनुसन्धानको केन्द्रमा एएफएका अध्यक्ष क्लाउडियो ‘चिकी’ तापियाको नेतृत्वमा भएका वित्तीय कारोबार तथा टुरप्रोडइन्टर (TourProInter) कम्पनीसँगको व्यावसायिक सम्बन्ध रहेका छन्।
अर्जेन्टिनाको दैनिक ला नासियोनका अनुसार एफबीआईका एजेन्ट र अमेरिकी संघीय अभियोजकहरूले अमेरिकामा एएफएसँग सम्बन्धित आर्थिक कारोबारबारे विभिन्न व्यक्तिहरूसँग बयान लिन सुरु गरिसकेका छन्। अमेरिकी न्याय विभागले एएफएले अमेरिकी वित्तीय प्रणालीमार्फत ३०० मिलियन अमेरिकी डलरभन्दा बढी रकम कसरी परिचालन गर्यो र ती कारोबारमध्ये कुनैले अमेरिकी कानुन उल्लङ्घन गरेको हुन सक्ने वा नसक्ने विषयमा अनुसन्धान गरिरहेको जनाएको छ।
समाचारअनुसार एफबीआईले व्यवसायी गिलेर्मो तोफोनीसँग जुममार्फत छलफल गर्दै केही वित्तीय कारोबारमा **सम्पत्ति शुद्धीकरण (मनी लन्डरिङ) वा अमेरिकी बैंकिङ प्रणालीमार्फत हुने ठगीजस्ता अपराधको सम्भावना रहेको विषयमा जानकारी संकलन गरेको छ।
यो अनुसन्धान सन् २०२५ देखि सुरु भएको बताइएको छ। अनुसन्धान टोलीमा वासिङ्टन डीसीका संघीय अभियोजक प्याट्रिक गुशु र क्रिस्टोफर टिङ , साथै फ्लोरिडाको दक्षिणी जिल्लाका अभियोजक माइकल बर्जर संलग्न छन्।
अनुसन्धानको मुख्य केन्द्र टुरप्रोडइन्टर कम्पनीलाई बनाइएको छ। उक्त कम्पनीले एएफएका अन्तर्राष्ट्रिय प्रायोजन तथा व्यावसायिक सम्झौताबाट प्राप्त रकम व्यवस्थापन गर्दै आएको बताइएको छ। यही कम्पनीमार्फत एडिडासबाट करिब ६० मिलियन अमेरिकी डलर र वार्नरबाट करिब ४० मिलियन अमेरिकी डलर सहित सयौँ मिलियन डलर बराबरको रकम परिचालन भएको उल्लेख गरिएको छ।
यद्यपि, हालसम्म अर्जेन्टिनी फुटबल संघ (AFA) वा यसका कुनै पनि अधिकारीविरुद्ध औपचारिक अभियोग दर्ता भएको वा कसैलाई दोषी ठहर गरिएको छैन। अनुसन्धान जारी रहेकाले अन्तिम निष्कर्ष आउन बाँकी रहेको अन्तर्राष्ट्रिय सञ्चारमाध्यमहरूले जनाएका छन्।
