काठमाडौं। दाङको घोराही उपमहानगरपालिका–१५ का वडा सदस्य उत्तम बुढाथोकी (४२) शिक्षा अधिकृतमाथि मोविल छर्किएको आरोपमा पक्राउ परेका छन्।
प्रहरीका अनुसार असार २७ गते पद्यमोदय पब्लिक नमुना माध्यमिक विद्यालयको विद्यालय व्यवस्थापन समितिको निर्वाचन बिथोल्ने उद्देश्यले मतदान अधिकृतसमेत रहेका घोराही उपमहानगरपालिका शिक्षा महाशाखाका शिक्षा अधिकृत अजय बोहोरा (४८) को मोटरसाइकल रोकी उनको शरीरमा मोविल छर्किएको आरोप बुढाथोकीमाथि लागेको छ।
घटनापछि फरार रहेका बुढाथोकीविरुद्ध अपमानजनक तथा अमानवीय व्यवहारसम्बन्धी कसुर अन्तर्गत असार २८ गते मुद्दा दर्ता गरिएको थियो। त्यसपछि दाङ जिल्ला अदालतबाट पक्राउ पुर्जी जारी भएपछि प्रहरीले असार २९ गते घोराही–१५ बाट लुकिछिपी बसेको अवस्थामा उनलाई पक्राउ गरेको हो।
प्रहरीले घटनाबारे थप अनुसन्धान जारी रहेको जनाएको छ।
