सङ्खुवासभा । सङ्खुवासभाको मादी नगरपालिका–४ डाँडागाउँमा घरायसी विवादका क्रममा श्रीमतीको हत्या गरेको आरोपमा एक जना पक्राउ परेका छन्।
जिल्ला प्रहरी कार्यालय सङ्खुवासभाका अनुसार पक्राउ पर्नेमा चैनपुर नगरपालिका–७ घर भई हाल मादी–४ डाँडागाउँ बस्दै आएका ५६ वर्षीय अमरबहादुर सार्की रहेका छन्।
शनिबार बिहान करिब ६ बजे घरायसी विवाद चर्किएपछि अमरबहादुरले आफ्नी ४३ वर्षीया श्रीमती फुलमाया मुदेलमाथि खुकुरी प्रहार गरेका थिए। गम्भीर घाइते भएकी फुलमायाको घटनास्थलमै मृत्यु भएको प्रहरीले जनाएको छ।
घटनापछि अमरबहादुर आफैं मादीस्थित मङ्लबारे प्रहरी चौकीमा पुगेका थिए। त्यसपछि इलाका प्रहरी कार्यालय चैनपुरबाट प्रहरी निरीक्षक पर्शुराम राईको नेतृत्वमा पुगेको टोलीले उनलाई घटनामा प्रयोग भएको खुकुरीसहित नियन्त्रणमा लिएको हो।
मृतकको शव पोस्टमार्टमका लागि मादी नगर अस्पताल, ओखरबोटमा राखिएको छ। घटनाबारे थप अनुसन्धान भइरहेको जिल्ला प्रहरी कार्यालय सङ्खुवासभाले जनाएको छ।
