दाङ । दाङ जिल्लाको घोराही उपमहानगरपालिकामा प्रहरीले ठूलो मात्रामा लागु औषधसहित तीन जनालाई पक्राउ गरेको छ। प्रहरीलाई प्राप्त गोप्य सूचनाको आधारमा गरिएको कारबाहीमा अफिम र चरेशसहित कुल ५० किलोभन्दा बढी लागुऔषध बरामद गरिएको हो। पक्राउ परेका व्यक्तिहरुमा रुकुम पूर्व पुथाउत्तरगंगा गाउँपालिका वडा नम्बर ४ का ३७ वर्षीय सुविन्द्र पुन र ऐ.ऐ.३ का ५१ वर्षीय चेतन बुढा रहेका छन्।
प्रहरीले ती दुई व्यक्तिहरुलाई घोराही उपमहानगरपालिका वडा नम्बर १८ मसिना क्षेत्रको सडकबाट शंकास्पद अवस्थामा पक्राउ गरेको थियो। उनीहरुको शरीर खानतलासी गर्दा सुविन्द्र पुनको साथमा निलो प्लाष्टिकको झोलाभित्र सेतो प्लाष्टिकमा प्याक गरिएको अफिम फेला परेपछि प्रहरीले उनीहरुलाई नियन्त्रणमा लिएको हो।
प्रहरीले बरामद गरेको लागुऔषधमा ३८ किलो ९७२ ग्राम चरेश र ११ किलो १८० ग्राम अफिम रहेका छन्। साथै, लागुऔषध तौल गर्न प्रयोग गरिएको डिजिटल तराजु, प्याकिङका लागि प्रयोग गरिएका विभिन्न आकारका प्लाष्टिक तथा टेपहरू पनि फेला परेको थियो। प्रहरीले तीनै जनालाई हिरासतमा राखेर थप अनुसन्धान गरिरहेको छ।
यस सफलतापूर्ण अपरेसनको प्रशंसा गर्दै दाङका प्रमुख जिल्ला अधिकारी(प्रजिअ) कृष्ण प्रसाद लम्सालले प्रहरीलाई सम्मान व्यक्त गरेका छन्। उनले भने, “दाङको जिल्ला प्रहरी कार्यालयका एसपी साब लगायत सबै प्रहरी कर्मचारीलाई प्रजिअको तर्फबाट सलाम जय नेपाल छ! ” प्रजिअ लम्सालको यो भनाइले प्रहरीले गरेको मेहनतको कदर भएको छ र यसले दाङ जिल्लामा लागुऔषध नियन्त्रणमा महत्वपूर्ण सफलता मिलेको छ।
यस घटनाले दाङमा लागुऔषध कारोबार नियन्त्रणमा ठूलो सफलता मिलेको र यसले अन्य अवैध कारोबार गर्ने गिरोहहरुलाई कडा सन्देश पुगेको प्रहरीको विश्वास छ।
