काठमाडौं । खोटाङमा शनिबार साँझ परेको अविरल वर्षापछि आएको खहरे खोलाको बाढीले बगाउँदा दुई जनाको मृत्यु भएको छ।
मृत्यु हुनेमा दिक्तेल रुपाकोट मझुवागढी नगरपालिका–६ नेर्पाकी ४३ वर्षीया शान्ता राई र केपिलासगढी गाउँपालिका–४ बाक्सिलाका ७१ वर्षीय पर्शुराम परियार रहेका छन्।
प्रहरीका अनुसार आफन्तको घरबाट फर्किने क्रममा सम्पर्कविहीन भएकी शान्ता राईलाई खोजतलास गर्दा खोलामा मृत अवस्थामा फेला पारिएको हो। यस्तै, गाइखुरे खोल्सीमा आएको बाढीले बगाएका परियारको शव घटनास्थलबाट करिब १०० मिटर तल फेला परेको जिल्ला प्रहरी कार्यालय खोटाङले जनाएको छ।
दुवै शवको पोस्टमार्टम प्रक्रिया पूरा गरी आफन्तलाई जिम्मा लगाउने तयारी भइरहेको प्रहरीले जनाएको छ। प्रहरीले घटनाबारे थप अनुसन्धान गरिरहेको छ।
