उर्लाबारी, मोरङ — मोरङको उर्लाबारी नगरपालिका–२ स्थित सुनझोडा सामुदायिक वनबाट प्रहरीले बेवारिसे अवस्थामा एउटा भरुवा बन्दुक र त्यसमा प्रयोग हुने विस्फोटक पदार्थ बरामद गरेको छ।
जिल्ला प्रहरी कार्यालय मोरङका अनुसार वन क्षेत्रमा चोरी–सिकार भइरहेको भन्ने विशेष सूचनाका आधारमा इलाका प्रहरी कार्यालय उर्लाबारीबाट खटिएको प्रहरी गस्ती टोलीले मंगलबार राति जंगल क्षेत्रमा खोजतलास गरेको थियो।
गस्तीका क्रममा जंगलभित्र रातो प्लास्टिकको बोरामा लुकाएर राखिएको अवस्थामा एउटा भरुवा बन्दुक तथा त्यसमा प्रयोग हुने विभिन्न विस्फोटक सामग्री फेला परेको प्रहरीले जनाएको छ।
बरामद गरिएको हतियार र विस्फोटक सामग्री इलाका प्रहरी कार्यालय उर्लाबारीमा सुरक्षित राखिएको छ। घटनामा संलग्न व्यक्ति तथा हतियारको प्रयोगबारे अनुसन्धान जारी रहेको जिल्ला प्रहरी कार्यालय मोरङका सूचना अधिकारी एवं प्रहरी नायब उपरीक्षक मकेन्द्रकुमार मिश्रले जानकारी दिएका छन्।
प्रहरीले वन क्षेत्रमा हुने अवैध गतिविधि नियन्त्रणका लागि निगरानी र गस्ती थप कडा बनाइएको जनाएको छ।
