महोत्तरी : महोत्तरीको सम्सी गाउँपालिका–५, पोखरभिण्डाका ३ वर्षीय मनिकेश कुमार यादवको हत्या प्रकरणमा प्रहरीले एक नाबालिकालाई नियन्त्रणमा लिएको छ।
प्रहरीका अनुसार २०८३ जेठ २२ गते घरबाहिर खेल्ने क्रममा बेपत्ता भएका मनिकेशको शव दुई दिनपछि स्थानीय पानी पोखरीमा बोराभित्र राखिएको अवस्थामा फेला परेको थियो। घटनापछि प्रहरीले विशेष अनुसन्धान अघि बढाएको थियो।
अनुसन्धानका क्रममा करिब १५ वर्षीया एक नाबालिकामाथि शंका लागेपछि सोधपुछ गर्दा उनले घटनाबारे स्वीकार गरेको प्रहरीले जनाएको छ। प्रारम्भिक बयानअनुसार, मल बोकेको साइकलमा ब्रेक नभएका कारण बालकलाई ठक्कर लाग्दा उनको मृत्यु भएको र घटना लुकाउने उद्देश्यले शव बोराभित्र राखी पोखरीमा फालेको खुलेको प्रहरीले जनाएको छ।
प्रहरीले मृतकका हातमा रहेका दुई थान चाँदीका बाला र घटनामा प्रयोग भएको साइकल समेत बरामद गरेको छ।
घटनामा संलग्न नाबालिकालाई नियन्त्रणमा लिएर महोत्तरी जिल्ला अदालतबाट पाँच दिनको म्याद थप गरी थप अनुसन्धान भइरहेको जिल्ला प्रहरी कार्यालय महोत्तरीका सूचना अधिकारी प्रहरी नायब उपरीक्षक पञ्च लाल गोलेले जानकारी दिएका छन्।
