रुपन्देही । रुपन्देही प्रहरीले आफूलाई “जिल्ला प्रहरी कार्यालय रुपन्देहीको घुमुवा प्रहरी” भनेर परिचय दिँदै नक्कली रिभल्भर देखाएर सर्वसाधारणसँग रकम असुल्ने प्रयास गरेको आरोपमा एक जनालाई पक्राउ गरेको छ।
पक्राउ पर्नेमा सिद्धार्थनगर नगरपालिका–१३ शान्तिनगरका स्थायी बासिन्दा तथा हाल ओमसतिया गाउँपालिका–४ बालापुरमा डेरा गरी बस्दै आएका ४९ वर्षीय राकेश प्रताप राणा रहेका छन्।
प्रहरीका अनुसार शुक्रबार साउन ८ गते साँझ करिब ७:३० बजे भैरहवा बजार क्षेत्रमा राणाले आफू घुमुवा प्रहरी भएको दाबी गर्दै नक्कली रिभल्भर देखाएर एक सर्वसाधारणसँग रु. १० हजार मागिरहेको भन्ने सूचना प्राप्त भएको थियो। उक्त सूचनापछि जिल्ला प्रहरी कार्यालय रुपन्देहीबाट प्रहरी निरीक्षकको नेतृत्वमा खटिएको टोलीले उनलाई नियन्त्रणमा लिएको हो।
त्यसपछि गरिएको शरीर तथा डेरा कोठाको खानतलासीका क्रममा एक थान नक्कली रिभल्भर, सवारी चालक अनुमतिपत्र, करिब ५०० ग्राम गाँजा, भिभो कम्पनीको एक थान एन्ड्रोइड मोबाइल तथा नेपाली नगद रु. २ हजार ६ सय बरामद भएको प्रहरीले जनाएको छ।
बरामद भएका सामग्रीसहित राणालाई जिल्ला प्रहरी कार्यालय रुपन्देहीमा राखी घटनाबारे थप अनुसन्धान भइरहेको प्रहरीले जनाएको छ।
