काठमाडौं। सशस्त्र प्रहरी बल (एपीएफ)मा कार्यरत इन्स्पेक्टर सन्तोषी महतको आत्महत्यालाई लिएर परिवारका सदस्यहरुले प्रहरीमा जाहेरी दिएका छन्। उनीहरुले महतको शंकास्पद आत्महत्याबारे कास्की प्रहरीमा जाहेरी दिएका हुन्। शनिवार राति पोखरास्थित हुल तथा दङ्गा व्यवस्थापन तालिम शिक्षालय लामापाटनमा इन्स्पेक्टर महत झुन्डिएको अवस्थामा मृत भेटिएकी थिइन्।
परिवारले उनलाई आत्महत्या गर्न बाध्य पारेको आरोपमा उनीभन्दा सिनियर सशस्त्र प्रहरी निरीक्षक विरुद्ध जाहेरी दिएका छन्। सशस्त्र प्रहरी मुख्यालयले शंका लागी छानविन समिति समेत गठन गरेको छ। सशस्त्र प्रहरीका प्रवक्ता कुमार न्यौपानेले छानविन समिति गठन गरेको जानकारी दिए।
उनका अनुसार डिआइजी लक्ष्मण सिंहको नेतृत्वमा छानविन गठन गरिएको छ। प्रहरीले दिएको जानकारी अनुसार तनहुँको भानुस्थित सशस्त्रको नम्बर-२३ मनकामना गणमा कार्यरत प्रहरी निरीक्षक विरुद्ध जाहेरी परेको छ।
उनीहरु पटक पटक घुम्न जाने गरेको र सँगै हिँड्ने गरेको सशस्त्र प्रहरीका एक अधिकृतले जानकारी दिए । ती इन्स्पेक्टरले सन्तोषीलाई आत्महत्या गर्न बाध्य पारेको आरोप छ। सशस्त्र प्रहरी स्रोतका अनुसार उनीहरू प्रेम सम्बन्धमा रहेका कारण सँगै बाहिर हिँड्डुल गर्ने गरेका थिए । पछिल्ला केही दिनयता ती इन्स्पेक्टरले तनाव दिने गरेको हुनसक्ने आशंका गरिएको छ।
मृतकको शव पोस्टमार्टमको लागि काठमाडौंस्थित त्रिवि शिक्षण अस्पतालमा ल्याइएको छ। इन्स्पेक्टर बेसिकको तालिम गर्दै आएकी महत पोखरास्थित हुल तथा दंगा व्यवस्थापन तालिम शिक्षालय लामापाटन ब्यारेकमा शनिवार साँझ मृत भेटिएकी थिइन्।
सिन्धुपाल्चोक घर भएकी महत १७ बेसिक (२०८१) की इन्स्पेक्टर हुन्। इन्स्पेक्टरको बेसिक तालिम गरिरहेकी उनी ब्यारेकको महिला शौचालयको नजिकको बिममा झुन्डिएको अवस्थामा मृत फेला परेपछि सशस्त्र प्रहरीले नेपाल प्रहरीलाई बोलाएर घट्ना मुचुल्का गराएको थियो।
२०७२ सालमा सशस्त्रकै सिपाहीमा भर्ना भएकी उनले २०७८ सालमा असईमा नाम निकालेकी थिइन्। त्यसपछि अहिले २०८१ सालमा इन्स्पेक्टरमा नाम निकालेर तामिल सुरु गरेकी थिइन्।
